సరస్వతి దేవి అలంకరణలో దుర్గా మాత..భక్తిశ్రద్ధలతో కుంకుమార్చన

సరస్వతి దేవి అలంకరణలో దర్శనమిచ్చిన అమ్మవారిని భక్తులు భక్తితో పూజించారు. ఆలయ పూజారి పనుగంటి తిరుపతయ్య ఆధ్వర్యంలో ప్రత్యేక పూజలు, కుంకుమార్చన నిర్వహించారు. మహిళలు పెద్ద సంఖ్యలో పాల్గొని అమ్మవారికి కుంకుమ సమర్పించి, కుటుంబాలు సుఖసంతోషాలతో ఉండాలని, ఆయురారోగ్యాలు కలగాలని ప్రార్థించారు.
విద్య, జ్ఞానం, వివేకానికి ప్రతీకగా భావించే సరస్వతి దేవి అలంకరణలో అమ్మవారి దర్శనం భక్తులకు ఆధ్యాత్మిక భావనను కలిగించింది. నవరాత్రుల సందర్భంగా ఆలయ ప్రాంగణంలో భక్తుల సందడి నెలకొంది. రామాలయ యూత్‌ సభ్యులు కార్యక్రమ ఏర్పాట్లను పర్యవేక్షించారు.ఈ కార్యక్రమంలో అమ్మవారి దీక్ష స్వాములు, మహిళలు, యువకులు, భక్తులు పాల్గొన్నారు.