తవ్వారు.. వదిలేశారు..!మూడేళ్లుగా మధ్యలోనే ఆగిన పనులు!

​నరకయాతన అనుభవిస్తున్న చేర్యాల భవన యజమానులు, వ్యాపారులు
​దారి లేక ఖాళీగా ఉంటున్న భవనాలు..

మున్సిపల్ అధికారుల తీరుపై తీవ్ర ఆగ్రహం
​

పన్నుల వసూళ్లలో ఉన్న శ్రద్ధ.. కనీస సౌకర్యాల కల్పనలో ఏదీ?
​చేర్యాల (హిందుస్థాన్ మీడియా):
​మూడేళ్లుగా మధ్యలోనే ఆగిన కాలువ పనులు
​చేర్యాల పట్టణ కేంద్రంలో రోడ్డు విస్తరణ పనుల పేరుతో గుంతలు తవ్వి, ఆపై పనులను ఏళ్ల తరబడి అరకొరగా వదిలేయడంతో స్థానిక భవన యజమానులు, వ్యాపారులు తీవ్ర నరకయాతన అనుభవిస్తున్నారు. రోడ్డు విస్తరణలో భాగంగా డ్రైనేజీ సైడ్ కాలువ నిర్మాణం కోసం తవ్వకాలు చేపట్టి మూడేళ్లు గడుస్తున్నా పనులు పూర్తి కాకపోవడం మున్సిపల్ అధికారుల, కాంట్రాక్టర్ల నిర్లక్ష్యానికి పరాకాష్ఠగా మారింది.
​ఆర్థికంగా నష్టపోతున్న భవన యజమానులు
​భవనాల ముందు తవ్విన గుంతలను పూడ్చకపోవడంతో లోపలికి వెళ్లేందుకు కనీస మార్గం లేక అనేక భవనాలు ఖాళీగా పడి ఉన్నాయి. వ్యాపార సముదాయాలు, ఇళ్లకు కిరాయిదారులు రావడానికి జంకుతుండటంతో యజమానులు ప్రతి నెలా భారీగా ఆర్థిక నష్టాన్ని చవిచూస్తున్నారు. మరోవైపు కాలువ తవ్వకాల వల్ల మురుగునీరు నిల్వ ఉండి తీవ్ర దుర్వాసన వెదజల్లుతోంది. ఈ నీటి తేమ కారణంగా తమ కోట్లాది రూపాయల భవనాల పునాదులు దెబ్బతింటున్నాయని యజమానులు తీవ్ర ఆందోళన వ్యక్తం చేస్తున్నారు.
​

అయోమయంలో అధికారులు – స్పష్టత కరవు
​ఇంకా ఐదు అడుగుల వరకు రోడ్డు విస్తరిస్తారా? లేక ఇక్కడితోనే పనులు ముగిశాయా? అనే ప్రాథమిక అంశంపై కూడా మున్సిపల్ అధికారులు ఎలాంటి స్పష్టత ఇవ్వకపోవడంతో ఇంటి యజమానులు తీవ్ర అయోమయంలో కొట్టుమిట్టాడుతున్నారు. గతంలో కూల్చివేసిన తమ నిర్మాణాలను తిరిగి నిర్మించుకోవాలో వద్దో తెలియక సందిగ్ధంలో పడ్డారు. "భవనాలు ఖాళీగా ఉన్నాయి... కిరాయిలు రావడం లేదు... లోపలికి వెళ్లే దారి కూడా లేదు... కానీ మున్సిపాలిటీ వారు మాత్రం పన్నులు కట్టాలంటూ డిమాండ్ నోటీసులు పంపుతున్నారు. మా ఆవేదనను పట్టించుకునే నాథుడే లేడా?" అని యజమానులు ప్రశ్నిస్తున్నారు.
​

ప్రజలు, భవన యజమానుల ముక్కుసూటి ప్రశ్నలు:
​
మూడు సంవత్సరాలుగా ఆగిపోయిన సైడ్ కాలువ నిర్మాణ పనులు ఎప్పుడు పూర్తవుతాయి?
​
భవనాల వద్ద తవ్విన ప్రమాదకర గుంతలను ఎప్పుడు పూడ్చివేస్తారు?
​
రోడ్డు విస్తరణ పరిమితిపై అధికారులు స్పష్టమైన ప్రకటన ఎప్పుడు చేస్తారు?
​ప్రజలను ఆర్థికంగా, మానసికంగా వేధిస్తున్న అధికారుల నిర్లక్ష్యంపై చర్యలు ఉంటాయా?
​ఇకనైనా మున్సిపల్ అధికారులు, ప్రజాప్రతినిధులు స్పందించి, డ్రైనేజీ కాలువ నిర్మాణాన్ని వెంటనే పూర్తి చేసి, రాకపోకలకు వీలుగా రోడ్డును పునరుద్ధరించాలని చేర్యాల భవన యజమానులు, బాధితులు డిమాండ్ చేస్తున్నారు.
​– | హిందుస్థాన్ మీడియా |
సామాన్యుడి నేస్తం 📰